Varðskipið Ægir. mbl.is/Árni Sæberg

Varðskipið Ægir hefur nú verið sent af stað frá Reykjavík og verður til taks, ef þörf er á,  austur af Stokknesi, en unnið er að björgun flutningaskipsins Ölmu sem er í togi Hoffells á leið til Reyðarfjarðar.

TF-LÍF hefur verið á Höfn í Hornafirði frá því í nótt og mun hún nú flytja stýrimann frá Landhelgisgæslunni um borð í flutningaskipið og verður svo til taks á Djúpavogi ef á þarf að halda. TF-GNÁ þyrla Landhelgisgæslunnar í viðbragðsstöðu í Reykjavík og áhöfn hennar á flugvelli. Um stórt flutningaskip er að ræða, með mikinn farm og 16 manns í áhöfn.

Veðuraðstæður fara versnandi og því telur Landhelgisgæslan fulla ástæðu til að vera með mikinn viðbúnað, samkvæmt upplýsingum frá Landhelgisgæslunni. 

Þar sem tungumálaörðugleikar hömluðu vinnu á staðnum fékk Landhelgisgæslan sér til aðstoðar túlk frá Alþjóðahúsinu sem hefur verið staðsettur í stjórnstöð Landhelgisgæslunnar frá í morgun. Um borð í flutningaskipinu ALMA eru sem fyrr segir 16 menn, 14 frá Úkraínu og 2 frá Rússlandi.

Flutningaskipið Alma er komið í tog á ný en dráttartaugin sem tengdi skipið við Hoffell slitnaði um ellefuleytið í morgun. Er stefnan tekin á Reyðarfjörð en leiðindaveður er á siglingaleiðinni frá Hvalsnesi þar sem skipin eru stödd núna. Heldur á að lægja í kvöld en hvessa á ný í fyrramálið.

Varðskipið Þór lagði af stað úr höfn um klukkan 14:30 en áætlað er að siglingin austur að Stokksnesi, þar sem flutningaskipið Alma var um miðjan dag, taki 15-16 klukkustundir. Ekki hefur verið tekin ákvörðun um hvort varðskipið Ægir verður sent austur til að aðstoða við björgun skipsins en áhöfnin er í viðbragðsstöðu.

Landhelgisgæslunni barst klukkan rúmlega þrjú í nótt aðstoðarbeiðni frá Birni Lóðs, dráttarbátnum á Höfn í Hornafirði vegna Ölmu, en stýri þess virkaði ekki þegar verið var að aðstoða skipið út fyrir ós í Hornafirði. Var stýrisblað farið, en skrúfa og vél skipsins voru í lagi. Um kl. 06:00 var komin dráttartaug komin milli Ölmu og Hoffells sem síðar slitnaði eins og áður sagði.

Þyrla Landhelgisgæslunnar er í viðbragðsstöðu á Höfn í Hornafirði sem og björgunarsveitir og lóðsinn.

Túlkur á vegum Alþjóðahússins aðstoðar starfsfólk Landhelgisgæslunnar í samskiptum við skipstjóra Ölmu en sökum tungumálaörðugleika gengu samskiptin brösuglega í morgun.

Alma er um 100 m langt skip og  skráð á Kýpur, en það hefur að undanförnu haft viðkomu í  Vestmannaeyjum og á Hornafirði.