Hnúfubakurinn hafði flækst í netunum en þau voru föst uppi í kjaftinum á honum. mynd/Feykir.is

Hnúfubakur flæktist í veiðarfærum netaveiðibátsins Hafborgarinnar í gær á Skagafirði og komst hann hvorki lönd né strönd. Ekki tókst að losa hann fyrr en búið var að aflífa skepnuna. Fréttavefurinn Feykir greinir frá þessu.

Fram kemur að Hafborgin, sem sé tæplega 10 tonna bátur, hafi verið að vitja þorskneta framan við Hólakot þegar Sævar Steingrímsson skipstjóri hafi orðið var við hnúfubakinn. Hann hafði flækst í netunum en þau voru föst uppi í kjaftinum á honum. Ekki tókst Sævari að losa skepnuna og hringdi í land eftir aðstoð skyttna en það var mat manna að eina leiðin til að losa skepnuna án þess að tjón yrði á veiðarfærum væri að aflífa hana.

Menn komust að þeirri niðurstöðu að eina leiðin til að losa skepnuna án þess að tjón yrði á veiðarfærum væri að aflífa hana. mynd/Feykir.is

Eftir að hvalurinn var aflífaður  var hann dreginn aftur á bak og losaður og sökk hann í hafið. Að sögn Sævars gekk þetta vel og að hans mati engin hætta á ferðum þó skepnan hafi verið stærri en báturinn því hún var mjög máttfarin. Ekkert tjón varð á bát né veiðarfærum.