Lóðsinn dró Kristbjörgu VE-071 til hafnar í Heimaey um hádegisbil í dag. Mbl.is/Jónas Erlendsson

Neta- og dragnótabáturinn Kristbjörg VE-071 kom í heimahöfn í Vestmannaeyjum nú upp úr hádegi. Kristbjörg varð vélarvana í gærkvöldi og lýsti Landhelgisgæslan yfir hættuástandi um tíma. Skipverjar vilja koma á framfæri þökkum til áhafna togaranna Páls Jónssonar og Jóns Vídalíns fyrir veitta aðstoð.

Páll Jónsson var fyrsta skip á vettvang í Meðallandsbugt. Taug var komið milli skipanna og Kristbjörg dregin frá landi á dýpri sjó. Togarinn Jón Vídalín tók svo við Kristbjörgu og dró skipið að hafnarmynni Heimaeyjar, þar sem Lóðsinn tók við henni síðasta spölinn. 

Að sögn Elvars Arnar Jóhannessonar skipverja um borð í Kristbjörgu segir að kafarar muni nú kanna skemmdirnar, en veiðarfærin fóru í skrúfur skipsins. "Það er búið að binda okkur við bryggju. Við fengum hjálp frá Lóðsinum og viljum skila þökkum til áhafna Páls Jónssonar og Jóns Vídalíns. Þetta gekk rosalega vel og við erum komnir heilir í höfn."

Kristbjörg hafði verið úti í einn og hálfan sólarhring þegar atvikið varð, en ætlaði að vera í þrjá. Elvar segir að aflanum sem náðist hafði verði landað eftir fyrstu skoðun á skrúfunni. "Þetta er bara kafaraviðgerð. Við vonumst til þess að geta farið út vonandi sem fyrst, þannig að þetta reddaðist allt saman."