Þriggja sjómanna er saknað eftir að togarinn Hallgrímur SI-77 sökk úti fyrir ströndum Noregs í gær. Tveir þeirra eru af Suðurnesjum en einn frá Reykjavík.

Nöfn þeirra sem er saknað:

Gísli Garðarsson, Vatnsholti 26, Reykjanesbæ fæddur árið 1949. Hann lætur eftir sig eiginkonu.

Einar G. Gunnarsson, Logafold 29, Reykjavík, fæddur 1944. Hann lætur eftir sig eiginkonu, fjórar uppkomnar dætur og eitt barnabarn.

Magnús Þórarinn Daníelsson, Mávatjörn 17, Reykjanesbæ, fæddur árið 1947. Hann lætur eftir sig eiginkonu, þrjú uppkomin börn og fimm barnabörn. Magnús var skipstjóri Hallgríms SI-77.

Sjómaðurinn sem komst lífs af hefur verið útskrifaður af sjúkrahúsi. Hann ætlar sér að leita áfallahjálpar á Íslandi. Þá segir flugstjóri björgunarþyrlunnar, sem bjargaði manninum,  að skipbrotsmaðurinn hafi gert allt rétt eftir að skipið fór að sökkva.

Hallgrímur SI-77 við bryggju í Siglufirði. mbl.is/Sigurður Ægisson

Norska strandgæslan hefur vegna veðurs hætt leit að mönnunum þremur sem saknað var að togaranum Hallgrími SI-77. Eru mennirnir taldir af, en björgunarbátur fannst mannlaus á þeim slóðum sem talið er að togarinn hafi farist.

Jan Lillebø, talsmaður björgunarmiðstöðvarinnar í Suður-Noregi, segir við vef VG, að aðstæður á svæðinu séu það slæmar að ekki sé lengur gert ráð fyrir að mennirnir finnist á lífi. Tvær björgunarþyrlur og eftirlitsflugvél tóku þátt í leitinni í kvöld ásamt loðnuskipi.

Verið var að flytja togarann til Noregs þegar hann sökk í dag en skipið hafði verið selt í brotajárn. Neyðarkall barst frá neyðarsendi í skipinu klukkan 13:14 í dag þegar skipið var statt um 150 sjómílur norðvestur af Álasundi inni í norskri lögsögu. Síðan náðist ekkert samband við skipið.

Fjórir voru í áhöfninni og var einum bjargað úr sjónum um borð í þyrlu síðdegis. Maðurinn var íklæddur flotgalla. Hann var fluttur til Álasunds með þyrlunni, sem lenti þar um klukkan 20 að íslenskum tíma. Var manninum ekið á sjúkrahús þar sem hann er í rannsókn. Var líðan hans sögð góð miðað við aðstæður