Skessuhorn.is

Forráðamenn Hvals hf hafa ákveðið að hvalveiðiskipin fari ekki til veiða í byrjun vertíðar heldur beðið átekta fram í ágústmánuð. Ástæðan er afleiðingar flóðbylgjunnar og jarðskjálftanna miklu í Japan í vetur, en meðal þess sem flóðbylgjan hreif með sér var niðurlagningaverksmiðja sem vann úr hvalaafurðum frá Hvalfirði. Gunnlaugur Fjólar Gunnlaugsson verkstjóri í Hvalstöðinni í Hvalfirði segir það mikil vonbrigði fyrir alla að blása þurfi veiðarnar af fyrri hluta sumars og óvissuna með hvort af veiðum verði. Það væri ekki aðeins þessi eyðilegging á mannvirkjum í Japan, heldur þjóðarsorg í landinu, sem leiði til þess að fólk fari lítið út fyrir hússins dyr, svo sem á matsölustaði. Gunnlaugur segir að í vetur hafa um 25 manns unnið í Hvalfirði að ýmsum lagfæringum og endurbótum á húsnæði og búnaði vinnslunnar.