„Þetta var mjög skrítið því það var mjög gott sjó­lag. Það var búin að vera al­ger blíða í róðrin­um en hann var aðeins far­inn að hvessa svona í lok­in. Síðan sneru þeir upp í og voru að taka stefn­una að landi þá myndaðist bara einn svaka­leg­ur hnút­ur. Bara al­ger­lega upp úr þurru. Svona er bara móðir nátt­úra. Maður veit aldrei.“

Þetta seg­ir Hauk­ur Ein­ars­son, skip­stjóri á línu­bátn­um Auði Vé­steins SU-88, í sam­tali við mbl.is en bát­ur­inn lenti í gær í brot­sjó í síðasta túrn­um sín­um fyr­ir jól út af Aust­fjörðum. Tókst áhöfn­inni í kjöl­farið að koma vél­un­um í gang og sigla til Djúpa­vogs en heima­jöfn Auðar Vé­steins er Stöðvar­fjörður. Hauk­ur var ekki með bát­inn þegar at­vikið átti sér stað held­ur af­leys­inga­skip­stjóri. Við brotið brotnaði ein rúða í brúnni og önn­ur fór úr og fóru að sögn Hauks fleiri hundruð lítra af sjó inn í brúna og sjór fór einnig í fleiri vist­ar­ver­ur í bátn­um. Öll tæki í brúnni eyðilögðust sem og farsím­ar áhafn­ar­meðlima.

Fjór­ir voru í áhöfn­inni að sögn Hauks. Þrír voru í brúnni og einn aft­ur á dekki við þrif. „Þetta voru fleiri hundruð lítr­ar af sjó sem komu inn í brúna. Síðan fengu strák­arn­ir smá rafstuð því þeir stóðu all­ir í sjó, voru hund­blaut­ir og síðan fór raf­magnið. En það voru eng­in slys á mönn­um og þeir náðu að sigla sjálf­ir í land ró­lega,“ seg­ir hann. Vinna er strax far­in í gang við að koma bátn­um í lag. Von­ir standa til þess að hann kom­ist aft­ur til veiða á milli jóla og ný­árs.

Björg­un­ar­sveit­in Gerp­ir á Norðfirði fékk til­kynn­ingu um at­vikið í gær og var haldið af stað á björg­un­ar­skipi til móts við Auði Vé­steins en að sögn Hafþórs Ei­ríks­son­ar, for­manns björg­un­ar­sveit­ar­inn­ar, var snúið við þegar ljóst var að bát­ur­inn kæm­ist af sjálfs­dáðum til Djúpa­vogs. Fjallað er um málið á frétta­vefn­um Afla­frétt­ir í dag.