bb.is | 18.12.2015 |

Stefnið á togaranum. Í baksýn er stórt flutningaskip sem er í smíðum í stöðinni.

Það var mikið um dýrðir að kínverskum sið í skipasmíðastöðinni í Shidao í Kína þegar samsetning á nýjum Páli Pálssyni ÍS hófst í gær. Eins og venja er í Kína var kveikt í miklu magni flugelda við þetta tækifæri. „Við svona tækifæri þá sprengja þeir mikið af kínverjum. Til dæmis ef það opnar ný verslun eða við andlát þá eru sprengdir kínverjar og þetta eru engar smá bombur og manni dauðbregður. Það voru sprengingar þegar það var byrjað að skera niður stálið og aftur nú við samsetningu,“ segir Sverrir Pétursson, útgerðarstjóri Hraðfrystihússins – Gunnvarar hf.

Skipasmíðin hefur til þessa falist í smíði á 12 meginblokkum sem voru smíðaðar á þremur stöðum í Shidao og nú er byrjað að sjóða þær saman og á næstu vikum kemst mynd á skipið. „Þeir eru mjög fljótir að sjóða blokkirnar saman. Afköstin þarna geta verið gífurleg. Til að gefa fólki mynd af stærðinni á þessari skipasmíðastöð þá er á þessu ári verið að skila 15 stórum flutningaskipum sem eru 250 metrar að lengd og meira en 70 fiskiskipum,“ segir Sverrir.

Hann segir að smíðin hafi gengið vel til þessa. „Að vísu stóðust fyrstu áætlanir ekki en við leggjum höfuðáherslu á að fá gott skip. Núverandi Páll er meira en fertugur og við segjum að nýi Páll eigi að duga í önnur fjörtíu ár,“ segir Sverrir kíminn.

Áætlanir gera ráð fyrir að skipið verði sett á flot í mars. „Þeir eru með mikið bryggjupláss og leggja áherslu á að koma honum að bryggju sem fyrst og rýma fyrir nýrri smíði á brautinni. Hann verður svo kláraður við bryggju.“

Sverrir vonast til að fá skipið afhent síðla næsta sumars eða snemmhausts. Þá tekur við löng heimsigling og Sverrir segir skipta máli hvort norðurleiðin verði fær, siglingaleiðin fyrir norðan Rússland. „Það tekur á bilinu 30-35 daga að sigla norðurleiðina heim. Með því að fara í gegnum Suez-skurðinn tekur siglingin 45 til 50 daga.“

Þegar núverandi Páli var siglt heim frá Japan árið 1972 tók heimförin tæpa tvo mánuði. „Þá hafði Suez-skurðurinn verið lokaður allt frá því í Sex daga stríðinu og það þurfti að sigla yfir Kyrrhafið og í gegnum Panama-skurðinn,“ segir Sverrir





Millidekkið.



Skrúfan er mun stærri en hefur tíðkast á togurum af þessari stærð. Eitt skrúfublað er sirka mannhæð að lengd.