Apríl 2007:  Sera ringur eldur kyknar umborð á stóra frystitrolaranum Hercules hjá Thor. 12 menn lótu lív.

Apríl 2007: Eldur kemur fyrstu ferð í verksmiðjutrolaran Athenu. Eingin av manningini fekk skaða. Ocean Group Faroes Ltd. átti Athenu, Thor í Hósvík var ein av eigarunum.

Oktober 2010: Eldur logar aftur umborð á Athenu. Eldur kom í, tá Athena var stødd 230 fjórðingar í ein útsynning úr Scillyoyggjum.

Mai 2011: Eldur kemur á triðja sinni í Athenu. Skipið var til umvælingar eftir eldin í árið fyri. Nú eldur aftur var í, lá hon við bryggju á Høgabóli á Skálafjørðinum.

Juli 2011: Eldur kyknar umborð á Thor-skipinum Varðborg. Varðborg var farin úr Peterhead og hevði siglt í tveir tímar, tá eldur kyknaði í útstoytinum.

Januar 2017: Eldur kyknar umbirð á Vesturlandi. Skipið var til fiskiskap á Føroya Banka, tá manningin varnaðist, at eldur var kyknaður umborð.

Sí upptøkuna niðanfyri

Brimil og Vædderen liggja hjá skipinum, og skipini hava í nátt roynt at basa eldinum á skipinum við at sproyta skúm á skipið men higartil til fánýtis.

Hitin frá eldsbrunanum á Vesturlandi er so mikið nógvur, at tað er avmarkað, hvussu nær Brimil slapp skipinum, tá skúm í nátt varð sproytað á skipið.

Greinin heldur fram niðanfyri

Upptøka: Vørn/Brimil

10 mans vóru við Vesturlandi, tá eldur kom í skipið um middagsleitið leygardagin. Einki skip var nær nærhendis, so tyrla varð send til skipið.

Bjargingartyrllan kom stutt fyri klokkan 15 á Landssjúkrahúsið við manningini, sum varð innløgd til kanningar fyri roykeitran eftir eldsbrunan á skipinum.

Skipið varð bygt á Tórshavnar Skipasmiðju í 1970, og er 31,7 metrar langt, sambært Teyggjuni. Tað er P/f Thor í Hósvík, sum eigur Vesturland.