Goðafoss á siglingu út af Gróttu mbl.is/Árni Sæberg

Eldur kviknaði um borð í Goðafossi um fjögur leytið í nótt. Samkvæmt upplýsingum frá upplýsingafulltrúa Eimskip hefur áhöfn skipsins tekist að ná tökum á eldinum og vinnur nú að því að kæla niður skorsteinshús skipsins þar sem eldurinn kom upp. Ekkert amar að skipsverjum.

Ólafur Hand, upplýsingafulltrúi Eimskips, segir í samtali við mbl.is að þetta hafi farið miklu betur en áhorfðist í fyrstu því það er alltaf alvarlegt þegar eldur kemur upp um borð í skipi. Þá ekki síst í jafn slæmu veðri og nú er.

Goðafoss er staddur í um 90 sjómílna fjarlægð frá Færeyjum og að sögn Ólafs fylgist stjórnstöð Landhelgisgæslunnar grannt með sem og Landhelgisgæslan í Færeyjum.

Þrettán eru í áhöfn Goðafoss auk þess sem þrír farþegar eru um borð.