31.05.2013 15:50

Portlandið selt innanbæjar í Eyjum

Ruv.is

 

Bærinn kaupir dragnótaskip

Höfnin í Vestmannaeyjum. Safnmynd: Sighvatur Jónsson.

Bæjarráð Vestmannaeyja hefur ákveðið að neyta forkaupsréttar síns að dragnótaskipinu Portland VE-97, ásamt aflahlutdeild, veiðarfærum og öðru því sem skipinu fylgir. Þetta er gert til að tryggja að skipið verði áfram gert út frá Vestmannaeyjum.

Núverandi eigandi Portlands hafði samið um sölu skipsins en lögum samkvæmt eiga sveitarfélög forkaupsrétt, séu skip seld út fyrir sveitarfélagið.

"Í lögum um stjórn fiskveiða er sveitarfélögum áskilinn sá réttur að ganga inn í kaup á bátum og kvóta þegar þau eru seld úr byggðarlaginu. Það er til að tryggja það að aflaheimildir séu ekki að færast á milli þegar enn er jafn arðbært að gera út í viðkomandi sveitarfélagi," segir Elliði Vignisson, bæjarstjóri í Vestmannaeyjum. "Við höfum kannað áhuga útgerða í Vestmannaeyjum til að ganga inn í þessi kaup og finnum fyrir honum. Við hyggjumst með þessu tryggja að þessi verðmæti fari ekki úr sveitarfélaginu og að þetta fólk missi þá ekki störfin og tækifærin."

Eigandi Portlands samdi um sölu skipsins og gaf bænum síðan færi á að ganga inn í kaupin, í samræmi við lög um stjórn fiskveiða. Í fyrra var útgerðarfélagið Bergur-Huginn selt úr bænum án þess að bænum gæfist færi á að nýta forkaupsrétt. Vestmannaeyjabær hefur höfðað mál gegn kaupanda og seljanda útgerðarinnar Bergs-Hugins. Seljandinn, Magnús Kristinsson, sagði á sínum tíma að forkaupsrétturinn næði aðeins til skipa en hvorki hlutabréfa né aflahlutdeilda. Raunin hefði verið sú að félagið sem ætti Berg-Hugin væri skráð í Reykjavík og því ætti Vestmannaeyjabær engan forkaupsrétt að skipinu. "Við teljum mikilvægt að fá úr þessu skorið fyrir dómstólum, hver raunverulegur réttur sveitarfélaga er. Því ef við töpum því máli verður löggjafinn að standa frammi fyrir því að réttur sveitarfélaganna er enginn og tólfta greinin óvirk," segir Elliði.

 

Útgerðarsögu afkomenda Binna í Gröf lýkur

Portland VE-97. Mynd af Facebooksíðu útgerðarinnar.
 

Útgerðarsögu Binna í Gröf og afkomenda hans lýkur um mánaðamót þegar dragnótaskipið Portland verður selt.

Þeir eru vandfundnir sjómennirnir sem eru sögufrægari en Binni í Gröf; Benóný Friðriksson, sem varð landsfrægur aflakóngur á skipi sínu Gullborginni upp úr miðri síðustu öld. Synir hans tóku við útgerðinni að honum gengnum og hefur útgerðarsaga fjölskyldunnar staðið óslitið yfir síðan þá, allt þar til nú um mánaðamót. Þá selja afkomendur hans dragnótaskipið Portland sem Sigurður, sonur Binna, og fjölskylda hans keyptu þegar Gullborg var seld um aldamót.

Arndís Sigurðardóttir segir það dapurlegt að verða að selja útgerðina. „Það er aðallega út af takmörkuðum aflaheimildum. Það var ekki orðið hægt að gera þetta út nema þrjá mánuði á ári. Svo náttúrulega hafa aukist álögur alveg gífurlega og það var bara stefna stjórnvalda að koma þessum litlu út.“ Hún segir að hærra veiðigjald og fleiri ákvarðanir stjórnvalda hafi gert reksturinn enn erfiðari hjá fyrirtækinu þar sem fjölskyldan hafi unnið saman. „Jájá. Synir okkar, annar var skipstjóri og hinn vélstjóri. Kallinn, faðir þeirra, nýhættur.“

Arndís fagnar því að skipið verði áfram í Vestmannaeyjum. Leitað var til skipasala og gerði utanbæjarmaður tilboð í skipið. Vestmannaeyjabæ var boðið að ganga inn í kaupin, í samræmi við lög um stjórn fiskveiða og ákvað bæjarráð að nýta forkaupsrétt sveitarfélagsins að skipinu og öllu sem því fylgir. Bærinn selur það áfram til útgerðarmanna í Vestmannaeyjum

(leiðrétting frá epj. Sá sonur Binna sem var útgerðarmaður af Portlandinu heitir Benóný, en ekki Sigurður)