Herjólfur sést hér í flotkví í Hafnarfirði í síðasta mánuði. mbl.is/Árni Sæberg

Siglingastofnun segir að Herjólfur sé ekki gott skip til siglinga í Landeyjahöfn enda hafi ferjunni aldrei verið ætlað að sigla þangað. Skipið risti of mikið og sé ekki nógu stefnufast.

Þá segir að vegna þess hve Herjólfur sé kvikur gagnvart öldu og straumi sé mikilvægt að umsjónaraðilinn geri úttekt á stjórnhæfni skipsins.

Fram kemur á vef Siglingastofnunar,  að vegna óhapps Herjólfs í innsiglingu hafi ferjan Baldur um tíma siglt á milli lands og Eyja. Það sé í annað skipti frá opnun Landeyjahafnar, en í fyrrahaust hafi Baldur leyst af um 5 vikna skeið á meðan Herjólfur var í slipp. Þá var enn mikill efnisburður vegna eldgossins í Eyjafjallajökli en þó þurfti aldrei að fella niður ferðir Baldurs vegna dýpis. Fram kemur að afleysingarnar hafi þvert á móti sýnt að með hentugra skipi gangi siglingar í Landeyjahöfn vel.

Herjólfur í Landeyjahöfn sl. sumar. mbl.is/Árni Sæberg

Bent er á, að nú í haust hafi ölduhæðin verið svipuð og í fyrra en meiri en árin 2009-10. Dýpið hafi þó verið nægjanlegt því sandburður hafi minnkað til muna. Þó megi reikna með að fyrir Herjólf lokist höfnin fljótlega en gæti miðað við reynslu verið opin fyrir Baldur jafnvel allt árið. Þá sé rétt að halda því til haga að strax haustið 2008, þegar bankahrunið olli frestun á smíði ferju, hafi það verið mat Siglingastofnunar að með áframhaldandi notkun á Herjólfi yrði Landeyjahöfn ekki siglingafær allt árið.

Afleysing Baldurs, sem sé mun grunnristara skip en Herjólfur og þannig líkari þeirri ferju sem höfnin sé gerð fyrir, sýni að það mat hafi verið rétt.

„Herjólfur er ekki gott skip til siglinga í Landeyjahöfn enda var honum aldrei ætlað að sigla þangað. Hann ristir of mikið og er ekki nógu stefnufastur. Brýnt er að greina hvernig stendur á því að innfjarðarferja sem þarf undanþágu til að sigla milli lands og Eyja skuli eiga auðveldara með siglingar í Landeyjahöfn en Herjólfur. Vegna þess hve Herjólfur er kvikur gagnvart öldu og straumi er mikilvægt að umsjónaraðili Herjólfs geri úttekt á stjórnhæfni skipsins,“ segir á vef Siglingastofnunar.

Jafnframt sé nauðsynlegt að koma straummælingum í horf við Landeyjahöfn. Hefðbundnar straummælingar hafi ekki gengið vel vegna mikils ölduróts en í undirbúningi sé uppsetning á mælingum með radar í landi sem skili jafnóðum meðalstraumum og stefnu á tilteknu svæði. Um sé að ræða nýlega tækni sem ekki hafi verið notuð fyrr í Evrópu.

„Einnig er áríðandi að eigendur og rekstraraðili Herjólfs komi straummæli sem er um borð í Herjólfi í lag því hann hefur ekki verið nothæfur. Sá mælir á að greina þann straum sem mætir skipinu á hverjum tíma,“ segir Siglingastofnun.