dv.is:

Björn Sverrisson, nemandi í sjávarútvegsfræðum við Háskólann á Akureyri, varð vitni að miklu brottkasti úr rannsóknaskipi Hafrannsóknastofnunnar, Bjarna Sæmundssyni RE 30, þegar hann fór einn túr með skipinu í tengslum við nám sitt þriðjudaginn 2. október síðastliðinn.

"Það var um það bil helmingnum af aflanum af tveimur holum kastað fyrir borð, eða tæplega tveimur tonnum. Ég er sjálfur gamall sjómaður, var á sjó á togara í þrettán ár þegar þetta var stundað, og mér leið eins og ég væri komin aftur til þess tíma," segir Björn í samtali við DV.is.

Hann segist hafa rætt við aðra sem hafa farið túr með Bjarna Sæmundssyni: "Flestir segja þeir sömu söguna, að svona hafi þetta verið í mörg ár."

Fiskistofa mun ekki beita sér í málinu
Þegar rætt er við Eyþór Björnsson, forstjóra Fiskistofu, sem gegnir mikilvægu hlutverki við að stuðla að ábyrgri og hagkvæmri nýtingu fiskistofna og hvala, um málið segist hann ekki hafa vitað af því að stundað sé brottkast á rannsóknaskipi Hafrannsóknastofnunar.

Spurður hvort að Fiskistofa muni aðhafast eitthvað vegna málsins svarar Eyþór: "Nei, í rauninni erum við erum ekki að fara í neinar aðgerðir gagnvart rannsóknaskipum. Við höfum heimildir til að svipta skip veiðileyfi ef þau brjóta af sér og rannsóknaskip eru ekki með veiðileyfi." Hann segir auk þess að ef Fiskistofa ætlaði almennt séð að beita sér vegna brota þá þyrfti hún að hafa sönnun fyrir því.

Hann segist ekki geta túlkað þetta sem lögbrot af hálfu Hafrannsóknastofunnar því engin viðurlög séu gagnvart rannsóknaskipum sem ekki eru með veiðileyfi. "Auðvitað gerir fiskveiðilöggjöf almennt ráð fyrir því að afla sé ekki kastað í hafið en þar er sérstaklega fjallað um skip sem hafa veiðileyfi, en ekki rannsóknaskip. Við erum ekki búin að greina þetta ofan í kjölinn en við erum ekki að fara í neinar aðgerðir gagnvart Hafró," segir Eyþór.

Aðspurður hvort það sé ekki bagalegt að starfsmenn Hafrannsóknastofnunnar stundi brottkast segir Eyþór forstjóra Hafrannsóknastofnunnar verða að svara fyrir það.

Bagalegt að afli sé látinn fara frá borði
Ekki náðist í Jóhann Sigurjónsson, forstjóra Hafrannsóknastofnunnar, við vinnslu þessarar fréttar en í gær birtist viðtal við hann á vef Morgunblaðsins um málið. Þar sagði Jóhann Hafrannsóknastofnun ekki vilja stunda neitt sem telst rangt eða ólöglegt og er ætlunin að fara yfir málið með ráðuneyti og Fiskistofu til að fá úr því skorið hverjar heimildir stofnunarinnar eru.

Þar sagði Jóhann einnig að honum þætti það bagalegt ef afli sé látinn fara frá borði.