Bæði þessi skip sem standa á myndinni í slippnum í Reykjavík í vikunni, hafa mikið verið milli tanna fólks. Hef ég lítið blandað mér í þá umræðu, en set þó fram mínar hugrenningar um mál beggja skipanna.

                                             Helga RE 49

Þegar ég birti frétt þess efnis á miðvikudag og búið væri að selja skipið til Gjögurs, ætlaði allt um koll að keyra hjá sumum og þá sérstaklega efasemdarmönnum. Fréttin var nánast eins og við blaðamenn kölluðum það SKÚBB og viðbrögðin voru í sömu átt. Ég fékk fyrirspurn eins og HVAÐAN, ég hefði þetta og aðrar sem bentu til þess að þarna væri ég að bulla. Sem gamall blaðamaður gaf ég ekki upp hvaðan ég fékk þetta, en get þó bent á að ég vissi um að þetta væri að gerast alla vikuna og beið bara eftir rétta augnablikinu til að segja frá því.
Aðrir bentu á að þetta væri búið að liggja fyrir í alla langan tíma og það er að hluta til rétt. Strax þegar mannskapnum var sagt upp á síðasta vetri og skipinu lagt fór að kvissast út að selja ætti það og einn af síðuhöfundum kom með frétt þess efnis, en hann var síðan þvingaður til að draga þau ummæli til baka og biðjast afsökunar á frumhlaupi sínu. Málið var að þetta var ekkert frumhlaup hjá honum og því var þetta oft rætt meðal manna, þar til málið varð endanlega ljóst.

                                                    Bergur - Huginn

Bæjarstjórinn í Vestmannaeyjum o.fl. hafa haft stór orð um ólöglega sölu á hlutafénu í Berg-Huginn. Hótað hefur verið málsókn, vegna brota á fiskveiðistjórnunarlögum.
Ég spyr hvaða brot? Reynslan mín í gegn um árin er að menn hafa oft selt hlutafé fyrirtækjanna og siðan hafa nýir stjórnendur gert ýmsar rósir. Munum hvernig Miðnes hf. fór upp á Akranes, þar voru gefin fögur loforð um að Sandgerðingar myndu ekki missa neitt, en ekki leið langur tími þar til búið var að loka öllu í Sandgerði, selja skipin og hirða kvótann. Því miður var þetta löglegt þar sem hlutaféð var fyrst selt og fyrirtækin síðan sameinuð. Svona gæti allt eins farið í Eyjum, varðandi söluna á hlutafénu til Síldarvinnslunnar, en því miður er ekkert við þessu að gera, það þarf fyrst að stoppa upp í götin í lögunum, sem heimila þessa aðgerð. Við höfum horft á alltof mörg mál eins og Miðnes og nú Berg-Huginn og allt hefur þetta verið löglegt, því miður.


             2749. Helga RE 49 og 2444. Vestmannaey VE 444, í Reykjavíkurslipp © mynd Jón Páll Ásgeirsson 6. sept. 2012