Eiríkur Ingi Jóhannsson hreif þjóðina í viðtali í Kastljósi í gær og segir Sigmar Guðmundsson að viðtalið væri eitt af þeim sem orkuðu hvað mest á hann í gegnum tíðina.

 "Þetta var mjög áhrifamikið og það voru allir í stúdíóinu með tárin í augunum," sagði Sigmar eftir viðtalið í gær. "Eiríkur vildi segja sögu sína nánast óhindrað. Þegar ég sat þarna hjá honum sá ég að það var engin ástæða til að spyrja hann, frásögn hans var svo skýr."

 Sigmar segir að það hafi verið "svakalegt" að vera viðstaddur meðan Eiríkur lýsti upplifun sinni. "Ég sat bara og hlustaði en ég hef aldrei verið með viðmælanda sem er þannig að ekki þurfti að spyrja hann spurningaí 80 mínútur. Þetta er lengsta viðtal Kastljóssins. Eiríkur er greinilega mjög heilsteyptur maður að geta sagt svo skýra frásögn strax."

 Fólk var agndofa eins og sjá má á fréttum um viðbrögð fólks 

 "Okkur leið sjálfsagt eins og ykkur heima í stofu. Eftir frásögn Eiríks sló þögn í dágóða stund, tökumenn, hljóðmenn og fleiri sem þarna voru þögðu. Þetta var mjög áhrifamikið og það voru allir með tárin í augunum."

 Sigmar vildi líka koma því á framfæri að þetta hefði allt verið gert í samráði við Eirík, aðstandendur Eiríks og fjölskyldu þeirra sem létust og að sá eini sem gæti dæmt um það hvort of snemmt sé að tala um atburðinn sé Eiríkur sjálfur. "Það eru kannski ekki allir að átta sig á því að Eiríkur vildi gera þetta," segir Sigmar. "Maðurinn sem veitir honum áfallahjálp var samþykkur því, því þetta hjálpar Eiríki."