8. september 2011

Vaðandi makríltorfur sjást enn í Breiðafirði. Á vef LÍU er rætt við Guðmund Smára Guðmundsson, framkvæmdastjóra G.Run hf. Þar segir Guðmundur Smári að tveggja ára sonarsonur hans hafi farið með afa sínum á veiðar í gær og fengið á krókinn feitan makríl, sem vó heil 900 grömm. Algengast er að makríllinn sé 300 til 600 grömm.  "Það var auðvitað gaman fyrir litla guttann að fá svona stóran makríl en það sem vakti meiri athygli mína var magainnihald makrílsins. Þegar við skoðuðum það kom í ljós heil smásíld. Það er klárlega vísbending um að makríllinn sé ekki aðeins í samkeppni við síldina um æti heldur sæki hann beint í hana við fæðuöflun," segir Guðmundur Smári.