17.12.2010 19:51

Bæjarstjórn Grindavíkur mótmælir ákvörðun sjávarútvegsráðherra

Af vefnum grindavik.is:

Bæjarstjórn Grindavíkur hvetur sjávarútvegsráðherra til að draga til baka ákvörðun um að banna blöndun fjölfosfata í saltfisk og léttsaltaðan fisk en þetta kemur fram í bókun á fundi bæjarstjórnar. Samkvæmt núgildandi reglum er ekki búið að taka fyrir notkun á fjölfosfötum í saltfiskframleiðslu. Bæjarstjórn telur því eðlilegra að ráðherra fylgi m.a. fordæmi Dana og Færeyinga og bíði niðurstöðu Evrópusambandsins, sem skoðar nú að heimila notkun á fjölfosfötum í saltfiskframleiðslu.

Ljóst er að um verulega hagsmuni er að ræða fyrir íslenska saltfiskframleiðendur og nauðsynlegt að þeir sitji við sama borð og framleiðendur í öðrum löndum. Áætlað er að framleiðsla á saltfiski skapi um 30 milljarða útflutningstekna á Íslandi, en þar af komi að minnsta kosti 20% frá Grindavík.

Bæjarstjórn Grindavíkur býður sjávarútvegsráðherra í heimsókn til Grindavíkur til að kynna sér málið með bæjaryfirvöldum og saltfiskframleiðendum.