Dragnótamenn segja að sjávarútvegsráðherra sé einangraður í deilunni um takmarkanir á dragnótaveiðum. Þeir segja að ráðherra hunsi fiskifræðileg viðhorf og virði ekki óskir heimamanna sem hlynntir séu dragnótaveiðum, að því er fram kemur í nýjustu Fiskifréttum.

Aðalfundur Samtaka dragnótamanna var haldinn um síðustu helgi. Friðrik G. Halldórsson, framkvæmdastjóri samtakanna, sagði í samtali við Fiskifréttir að fundurinn hefði einkennst af þeirri varnarbaráttu sem dragnótamenn standi í gegn árásum Jóns Bjarnasonar sjávarútvegsráðherra á þessa grein undanfarin ár.

Fyrr á árinu kvörtuðu Samtök dragnótamanna til umboðsmanns alþingis vegna reglugerðar sjávarútvegsráðherra um lokun á svæði úti af norðanverðum Ströndum fyrir dragnótaveiðum. ,,Þetta er svæði sem liggur ekki að neinni byggð og þar hafa nánast engar veiðar verið stundaðar í önnur veiðarfæri. Því er ekki til að dreifa að dragnótin trufli aðrar veiðar. Ráðherra getur heldur ekki borið því við að hann hlusti á heimamenn því þarna búa engir. Umboðsmaður tók kvörtun okkar til meðferðar. Hann hefur kynnt sér málið og vonandi kemur álit frá honum innan tíðar," sagði Friðrik.

Sjá nánar í nýjustu Fiskifréttum.

Landhelgisgæslan hefur fengið fjármagn til þess að taka þriðju stóru björgunarþyrluna á leigu á næsta ári. Ásgrímur L. Ásgrímsson starfandi framkvæmdastjóri aðgerðarsviðs Gæslunnar greindi frá þessu í erindi á þingi Farmanna- og fiskimannasambands Íslands í síðustu viku.

Vonast er til þess að ný leiguþyrla verði komin í gagnið fljótlega á næsta ári en þá á TF-LÍF að fara í skoðun. Landhelgigæslan er núna með tvær stórar björgunarþyrlur í rekstri en þær þurfa að fara í skoðun með reglubundnu millibili. Með því að fá þriðju björgunarþyrluna ætti því að vera hægt að tryggja að ávallt séu að minnsta kosti tvær stórar þyrlur til taks hérlendis í senn.

Verulega hefur dregið úr sjódögum varðskipanna við Ísland eftir hrun en á móti hafa þau verið í leiguverkefnum erlendis.

 Sjá nánar í Fiskifréttum sem komu út í dag.

Norðmenn hafa samið um smíði á 26 stórum og fullkomnum skipum sem afhent verða á næstu árum. Alls verja þeir sem samsvarar 100 milljörðum íslenskra króna í þessar nýsmíðar. Hér er einkum um uppsjávarskip og frystitogara að ræða, að því er fram kemur í nýjustu Fiskifréttum.

Mikill hugur er í Norðmönnum og án efa á nýsmíðum eftir að fjölga á næstu misserum. Á sama tíma er aðeins eitt stórt fiskiskip í smíðum fyrir Íslendinga og alls óvíst hvort það verði gert út héðan. Íslenski fiskiskipaflotinn er orðinn mjög gamall og löngu tímabært að endurnýja stóran hluta hans. Jafnvel er talið að við þyrftum að fá um tíu nýsmíðuð skip á ári ef vel ætti að vera.

Fiskifréttir ræddu við forsvarsmenn nokkurra útgerða og þar kom fram að miðað við óvissu í sjávarútvegi, yfirvofandi innköllun veiðiheimilda og skattahækkanir myndi ríkja stöðnun í endurnýjun skipa. Á meðan drægist íslensk útgerð aftur úr en Norðmenn, helstu keppinautar okkar á mörkuðum erlendis, sigldu langt framúr okkur.   

Sjá nánar í nýjustu Fiskifréttum.