Í gær ákvað Landhelgisgæsla Íslands að stefna rannsóknarskipinu Seabed Constructor til hafnar vegna gruns um að það hefði stundað ólöglegar rannsóknir í íslensku efnahagslögsögunni. Frá því skipið lagði úr höfn í Reykjavík 22. mars hefur það haldið sig á afmörkuðu svæði um 120 sjómílur suðaustur af landinu. Skipið er í eigu norskrar útgerðar en leigutakinn er skráður í Bretlandi. Þegar stjórnstöð Landhelgisgæslunnar óskaði skýringa á athöfnum skipsins voru svörin sem fengust óljós og því var ákveðið að stefna skipinu til hafnar til að fá frekari skýringar. Þyrla Landhelgisgæslunnar flaug að Seabed Constructor síðdegis í gær. Þá sigldi varðskipið Þór til móts við skipið og mætti því upp úr hádegi í dag. Búist er við að skipin komi til hafnar í Reykjavík í fyrramálið. Þar tekur lögreglan á höfuðborgarsvæðinu við rannsókninni. Tekin verður skýrsla af skipstjóranum og dagbækur og búnaður skipsins rannsakaður til að fá frekari vitneskju um athafnir þess að undanförnu.

Kemur þetta fram á Fb síðu Landhelgisgæslunnar.

Seabed Constructor © mynd Landhelgisgæslan