Eins og þig eigið flest að vita, sagði ég frá því í síðustu viku að senn myndi ég hefja birtingu á myndum sem ég og Birgir Guðbergsson tókum fyrir þó nokkru síðan og eru sumar hverjar hreinar perlur. Þarna koma myndir af ýmsum hásetum sem nú eru yfirmenn, svo og fleirum en það. Mun ég sleppa því að birta nöfnin áður en myndirnar birtast. Um er að ræða hátt í 300 myndir, sem flestar hafa aldrei birts áður.

Auk mynda af bátum og skipum, eru syrpur teknar um borð í ákveðnum bátum, ýmist á nótaveiðum, reknetum eða netaveiðum.

Í síðustu viku þegar ég kynnti þetta, birti ég frásögn af bátnum Elvis og það þegar hann týndist og fannst sem betur fer aftur. Nú kemur mynd af öðrum eiganda bátsins, en þessi mynd er tekin af honum um borð í Helgu Guðmundsdóttur BA 77 á árinu 1980, sá er Baldvin Nielsen og  verður sá bátur m.a. mikið í sviðsljósinu. En hann er einn þeirra báta sem koma við sögu á næstu vikum.

Fyrst ég er að birta mynd af Baldvini, birti ég samkvæmt hans ósk eftirfarandi um það sem kom fram í greininni í síðustu viku og  meira um það mál.

Myndir þær sem fylgdu umræddri grein og voru af Elvis voru teknar er hann var í prufusiglingu eftir viðgerð á Patreksfirði, eftir að hafa verið dreginn þangað í framhaldi af því að hann fannst. Hafrún sem var um borð í Elvis þessa ferð var 16 ára og strákarnir Birgir og Baldvin voru 18 ára, skipverjar á Helgu Guðmundsdóttur BA 77.

Í umfjölluninni birti ég mynd af úrklippu úr blaði einu, sem sagði frá atburðinum og óskaði Baldvin eftir því að fram kæmi að frásagnir blaðana voru mjög misjafnar og sumt alls ekki rétt með farið. Dagblaðið Vísir var fyrst með fréttina, en hún birtist á forsíðu blaðsins 30. júní 1982.  Tíminn birti frétt um málið á bls. 3 þann 1. júlí  og Morgunblaðið á blaðsíðu 9 þann 3. júlí 1982.