ruv.is:

Mynd: Rúv

 

Tollayfirvöld heimila ekki að skipið Just Mariiam fari úr höfn. Skipið kom hingað til lands rétt fyrir áramót til þess að safna brotajárni. Umhverfisstofnun hefur kært málið til lögreglu þar sem skipverjar höfðu ekki tilskilin leyfi.

Skipið er skráð í Moldóvu og kom til Hafnar í Hornafirði frá Noregi 27. desember. Þá var enginn farmur um borð í skipinu. Samkvæmt upplýsingum frá hafnarstarfsmönnum á Höfn fengu skipverjar þar brotajárn frá verktakafyrirtækinu Rósabergi. Aðallega gamalt járnarusl, gamlar vinnuvélar og fleira, alls á annað hundrað tonn.

Framkvæmdastjóri fyrirtækisins segir að skipverjar hafi fengið brotajárnið gefins en félagið hafi ekki haft hugmynd um að þeir störfuðu án tilskilinna leyfa. Áður hafi maður af erlendum uppruna haft samband við verktakana og fengið leyfi til að hirða járnadraslið. Svo virðist sem maður á vegum útgerðarinnar leiti uppi járnarusl hér á landi.

Skipið sigldi frá Höfn til Hafnarfjarðar 8. janúar. Starfsmenn Umhverfisstofnunar fóru í eftirlitsferð um borð í skipið á dögunum og gátu skipverjar þá ekki framvísað starfsleyfi til meðhöndlunar á úrgangi og heldur ekki leyfi til flutnings á spilliefnum milli landa. Reglur um slíkt eru til að koma í veg fyrir að spilliefnum, sem dýrt er að farga, sé safnað í þróuðum löndum og þeim hent á ruslahauga í fátækari löndum. Þá kærði Umhverfisstofnun málið til lögreglu og fór fram á að skipið fengi ekki að fara úr höfn. Skipið átti að sigla með brotajárnið til Tripoli, höfuðborgar Líbíu í lok þessarar viku. Talið er að þar hafi átt að bræða brotajárnið.

Kristinn Már Ársælsson, teymisstjóri hjá Umhverfisstofnun, segir við fréttastofu að tollayfirvöld hér á landi ætli ekki að veita skipinu leyfi til að sigla úr höfn að svo stöddu. Umhverfisstofnun hefur sent hafnarumboðsmanni Just Mariiam bréf, þar sem óskað er skýringa. Þar á bæ sögðust menn ekki hafa vitað að skipið væri án leyfis og ekkert um hvað þeir voru að gera hér á landi.  

Just Marian, í Hafnarfirði © mynd ruv.is