20.09.2013 11:59
Heimilt að veiða makríl út september
mbl.is, fyrir nokkrum mínútum:
Sjávarútvegsráðherra hefur ákveðið að heimilað verði að stunda færaveiðar á makríl á grunnslóð til 30. september. Reglugerð um það verður gefin út síðar í dag.
Þetta kemur fram á vef Landssambands smábátaeigenda (LS).
Fram kemur, að LS hafi fylgst náið með gangi veiðanna og telur afar mikilvægt að veiðarnar verði leyfðar út vertíðina.
„Þannig mundu mikilvægar upplýsingar nást um göngu makrílsins auk stærðarsamsetningu og gæða. Af þessum sökum var óskað eftir við ráðherra að veiðarnar yrðu ekki stöðvaðar í dag 20. september eins og reglugerð kvað á um,“ segir í tilkynningunni.
Þá segir, að í dag séu veiðisvæðin fimm talsins; á Steingrímsfirði, útifyrir Snæfellsnesi, í Helguvík, í Sandvík og á Berufirði. Loks kemur fram að heildarveiði smábáta sé nú komin í 4.518 tonn.
Skrifað af Emil Páli
