183. Sigurður VE 15 í Vestmannaeyjum © mynd Halldór Guðmundsson, 20. júlí 2013

Ruv.is:

Sigurður VE, eitt af eldri aflaskipum íslenska flotans, siglir nú sína hinstu för til niðurrifs í Danmörku. Útgerð skipsins á von á nýju skipi í stað tveggja eldri.

53 ára skip
Sigurður var smíðaður í Þýskalandi fyrir rúmlega hálfri öld fyrir Ísfell á Flateyri, fyrirtæki Einars Sigurðssonar, sem nefndur var Einar ríki. Skipið kom til landins árið 1960. Eftir sameiningu útgerða varð það hluti af flota Ísfélags Vestmannaeyja. Fyrst var Sigurður svokallaður síðutogari. Hann átti að nota til karfaveiða við Nýfundnaland. Þegar karfinn hvarf þar um slóðir var skipinu lagt. 1963 hélt skipið aftur til togveiða með góðum árangri. Tíu árum síðar var Sigurði breytt í nótaveiðiskip.

Yfir milljón tonn
Sigurjón Ingvarsson, skipstjóri Sigurðar í hinstu siglingu skipsins, segir að Kristbjörn Árnason, sem var jafnan kallaður Bóbi, hafi fiskað meira en milljón tonn þau 30 ár sem hann var með skipið. Skipið komst í fréttirnar fyrir fleira en aflabrögð. Sumarið 1997 var Sigurður færður til hafnar í Noregi vegna loðnuveiða innan norskrar lögsögu sem útgerðin var sektuð fyrir.

Nýtt skip í stað tveggja eldri
Nú verður Sigurður að brotajárni í Danmörku. Helgi Marinó Sigmarsson var einn þeirra sem kvöddu Sigurð á bryggjunni í Vestmannaeyjum í gær. Helgi man vel eftir afleysingartúrunum á Sigurði fyrir rúmum fjörutíu árum. Hann vildi nota Sigurð áfram, sem skólaskip. Ísfélagið á von á nýju skipi til landsins í upphafi næsta árs. Það á að leysa tvö af eldri skipum félagsins af hólmi.

mbl.is:

Nýtt skip Ísfélags Vestmannaeyja

Ísfélag Vestmannaeyja hf hefur gert samning um kaup á skipi sem er í smíðum í Celiktrans skipasmíðastöðinni í Istanbúl í Tyrklandi. Skipið verður afhent tilbúið til veiða í byrjun næsta árs.

Skipið er 80 metra langt og 17 metra breitt og er afar vel búið til veiða á uppsjávarfiski s.s. loðnu, síld, makríl og kolmunna. Kælitankar skipsins eru 2.970 rúmmetrar, samkvæmt tilkynningu frá ísfélaginu.

"Kaupin eru liður í endurnýjun á skipaflota Ísfélagsins og þáttur í hagræðingaraðgerðum þess ekki síst í kjölfar sífellt aukinnar skattlagningar stjórnvalda. Félaginu er ætlað að greiða um tvo milljarða í veiðigjöld og tekjuskatt á þessu ári. Félaginu er því nauðsynlegt að fækka skipum og auka hagræði á öllum sviðum rekstursins.

Gera má ráð fyrir að hið nýja skip leysi tvö af eldri skipum félagsins af hólmi, með tilheyrandi lækkun olíu- og launakostnaðar," segir í tilkynningu.