Ég verð að viðurkenna það að þó ég sé kominn á sjötugsaldurinn, hef ég aldrei upplifað aðra eins veislu fyrir augað, hvað varðar fiskveiðar, eins og þetta hefur verið í dag og undanfarna daga út af Keflavík. Enda voru komnir 23 bátar kl. 10.30 í morgun og síðan hefur þeim fjölgað eitthvað. Aflabrögð hafa oft verið mjög góð og eru þó nokkrir búnir að landa einu sinni og farni úr aftur. Sumir þeirra voru m.a. með 8 og upp í 10 tonn. Þessi veisla er líka kærkomin fyrir ljósmyndarann og því hef ég tekið mikið magn af myndum sem sýndar verða hér í kvöld, á morgun og einnig á föstudag og kannski eitthvað lengur.

Hér birtist mynd sem ég tók í stúkusæti, á Vatnsnesi í Keflavík og sést þar fiskur á hverjum króki, en í þessu tilfelli er báturinn Öðlingur SU 18, en á morgun koma fleiri myndir sem tengjast þeim báti.

Talandi um stúkusæti þá hefur fólk hópast niður á bakkann við sjóinn til að horfa á þetta mikla fjör sem verið hefur á sjónum fyrir utan, svo og utan við Helguvík.


              Makríll á hverjum krók. Að vísu var þetta ekki alltaf stanslaust, heldur þurftu bátarnir að kippa aðeins af og til, en þó var það misjafnt © mynd Emil Páll, í dag, 28. ágúst 2013