ruv.is:

 

Farþegaskipið Víkingur hefur hlotið öll tilskilin leyfi til siglinga.

 

Farþegaskipið Víkingur fékk leyfi til siglinga á föstudag. Skipið siglir þó ekki enda hljóðar leyfið upp á mun færri farþega en aðstandendur þess vonuðust til.

Skipið Víkingur, sem ætlað er að sigla milli Vestmannaeyja og Landeyjahafnar fékk leyfi til farþegasiglinga á föstudag. Að sögn starfsmanna skipsins hefur það siglingar í þessari viku. Starfsmenn Viking Tours, sem á skipið, fagna leyfisveitingunni en segja óánægju ríkja með takmörkun á fjölda farþega og gildistíma leyfisins. Skipið tekur 100 farþega, en leyfið hljóðar upp á siglingar með 41 til Landeyjahafnar og 70 í útsýnissiglingar.

Að sögn Óðins Steinssonar, starfsmanns Viking Tours, hefur fyrirtækið sótt um rýmkun á leyfinu og vonast til að það verði veitt á næstu dögum. Fáist það býst Óðinn við því að skipið hefji siglingar fyrri hluta þessarar viku, þá með leyfi upp á allt að 80 farþega sem er vel undir því sem björgunarbúnaður skipsins leyfir, bæði frá Landeyjahöfn og í útsýnissiglingar. Víkingur fer ekki áætlanaferðir en átti að fara í prufusiglingu í gær þar sem allur búnaður og skipulag yrði yfirfarið.

Víkingur er þriðja skipið á Íslandi sem hlýtur leyfi til að sigla um svokallað hafsvæði B. Áður hafa Herjólfur og Sæfari hlotið leyfið.