mbl.is:

Björgunarbátur Landhelgisgæslunnar. Ljósmynd/Landhelgisgæslan

Rétt eftir klukkan ellefu í gærkvöldi barst Landhelgisgæslunni neyðarkall frá þýskri seglskútu sem stödd var 17 sjómílur vestur af Garðskaga. Leki hafði komið að skútunni en um borð voru 12 manns, fjórir í áhöfn og átta farþegar. Nærstödd skip, þyrla Landhelgisgæslunnar og björgunarskip voru send á vettvang. Togarinn Hrafn Sveinbjarnarson kom fyrstur á vettvang og þyrlan skömmu síðar.

Ekki reyndist unnt að koma björgunarmönnum um borð þegar í stað vegna veðurs og sjólags, en nokkur vindur var á svæðinu. Rétt eftir klukkan tvö í nótt tókst áhöfn björgunarskipsins Fiskikletts frá Hafnarfirði að koma björgunarmönnum og dælum um borð. Björgunarbáturinn Einar Sigurjónsson hefur nú flutt allt fólkið til Sandgerðis þar sem hlúð er að því. Samkvæmt upplýsingum frá Landhelgisgæslunni er skútan að öllum líkindum sokkin.

Mikil mildi þykir að tekist hafi að bjarga öllum sem voru um borð í skútunni. Þungur sjór gerði björgunarmönnum erfitt fyrir á vettvangi. Þá vakti það einnig athygli björgunarmanna hversu illa búið fólkið var.

Að sögn lögreglunnar á Suðurnesjum er nú hlúð að fólkinu og verður tekin skýrsla af því síðar í dag.