Í gegn um árin hafa flest allir stálbátarnir sem lifað hafa einhvern tíma hér á landi, farið í algjöra endurbyggingu, þar sem þeir hafa komið svo gjörbreyttir til baka að þeir eru óþekkjanlegir frá því skipi sem var fyrir breytingarnar. Sumir hafa farið í skrokkbreytingar, en aðrir aðeins í breytingar ofandekks. Flestar hafa þessar breytingar farið fram erlendis, en ein og ein hérlendis. Hér tek ég fyrir einn sem var af árgerðinni 1960 og var nánast talinn ónýtur eftir bruna þegar Dráttarbraut Keflavíkur tók sig og keypti flakið og endurbyggði. Úr varð allt annað skip, skip sem hét áður en endurbygging hófst Jón Ágúst GK, en kom út sem Fönix KE. Þó þetta skip sé enn til, hefur það oft á tíðum litið ansi illa út, verið frekar í slæmu ástandi en er nú uppi á Akranesi, þar sem a.m.k. er verið að mála það. Þá var skipið skrá að nýju sem Arnfríður Sigurðardóttir RE 14, en fór þó aldrei í útgerð undir því nafni, heldur fór hann af stað á síðasta ári sem Fönix ST 177.
Hér birti ég nokkar myndir af Fönix, þegar hann var sjósettur að nýju hjá Dráttarbraut Keflavíkur eftir að endurbætum var lokið í marsmánuði 1986.












      177. Fönix KE 111 sjósettur í Dráttarbraut Keflavíkur, eftir að hafa verið yfirbyggður og endurbættur eftir bruna

                           177. Fönix KE 111 og 89. Árni Geir KE 74 .

Þessir bátar eru báðir ennþá til og eru í dag: 177. Fönix ST 177 og 89. Grímsnes BA 555

           Fönix KE 111, á siglingu til Keflavíkurhafnar eftir sjósetninguna í Dráttarbrautinni

                                               177. Fönix KE 111, í Keflavíkurhöfn

                                        © myndir Emil Páll, í mars 1986

Smíðanúmer 350 hjá Gravdal Skipbyggery, Sunde, Noregi 1960.

Endurbyggður og yfirbyggður hjá Dráttarbraut Keflavíkur hf. 1981-1986, eftir að eldur kom upp í bátnum, er hann hét Jón Ágúst GK 60,  28 sm. VNV af Garðskaga þann 31. janúar 1978. Áhöfn v/s Týs slökkti eldinn og dró bátinn síðan til Njarðvíkur.

Strandaði sem Bergvík VE 505, í Vöðlavík milli Eskifjarðar og Neskaupstaðar 18. des. 1993. Við björgunartilraun á bátnum fékk björgunarskipið Goðinn á sig brot og strandaði og sökk 10. janúar 1994 og við það fórst einn skipverji Goðans, en Varnarliðið bjargaði sex skipverjum í aftakaveðri. Varðskipið Týr dró síðan Bergvíkina af strandstað lítið skemmda aðfaranótt 13. janúar 1994.

Úrelding var samþykkt 3. september 1994, en hætt var við úreldinguna 31. mars 1995.

Stefni bátsins var breytt 1998.

Breytt hjá Skipalyftunni í Vestmannaeyjum frá jan- mars 2003 í veiðiskip á þorski til áframeldis.

Lá í Reykjavíkurhöfn frá 11. nóv. 2004 til 18. des. 2009 að hann var dreginn af hafnsögubátnum Leyni upp á Akranes. Þann tíma sem báturinn lá í Reykjavíkurhöfn, var hann ýmist skráður Eykon RE 19, Adolf RE 182, eða Adolf RE 19, þó alltaf stæði á bátnum sama skráningin Eykon RE 19. Var afskráður sem fiskiskip 24. ágúst 2005 og skráður að nýju sem fiskiskip á síðasta ári.

Nöfn: Seley SU 10,  Jón Þórðarson BA 80, Guðmundur Kristján BA 80, Jón Ágúst GK 60, Jón Ágúst GK 360, Fönix KE 111, Bergvík VE 505, Krossanes SU 5, Stakkur VE 650, Surtsey VE 123, Adolf Sigurjónsson VE 182, Kristjana GK 818, aftur Adolf Sigurjónsson VE 182, Eykon ÍS 177, Eykon RE 19, Adolf RE 182, Adolf RE 19, Arnfríður Sigurðardóttir RE 14 og núverandi nafn: Fönix ST 177.