ruv.is:

 

               1343. Magnús SH 205, í Skipasmíðastöð Þorgeirs & Ellerts á Akranesi, meðan slökkvistarf stóð enn yfir í gær © mynd ruv.is

 

 

Fjörtíu slökkviliðsmenn tóku þátt í umfangsmestu aðgerðum í langan tíma á Akranesi þegar eldur kom upp í 230 tonna fiskiskipi eftir hádegi í gær. Niðurlögum eldsins var ráðið um miðnætti í gær en eldur blossaði aftur upp í nótt segir slökkviliðsstjóri.

Eldur kviknaði í skipinu síðdegis í gærdag þegar unnið var í því í skipasmíðastöðinni á Akranesi. Undir kvöld komu slökkviliðsmenn logandi skipinu út úr byggingunni. Þráinn Ólafsson, slökkviliðsstjóri í bænum, segir að eldurinn hafi verið slökktur um miðnætti. „Svo gaus upp um eitt, hálftvö aftur svolítill eldur sem var fljótt slökktur.“

Þráinn segir að slökkviliðsmenn hafi ráðið betur við eldinn þegar skipinu hafði verið komið út úr byggingunni. „Skipið er mikið brunnið en vélarrúmið virðist hafa sloppið nokkuð vel,“ segir hann. 

Ástand skipsins verður metið fyrir hádegi í dag en ekki er ljóst hvort það muni sigla á ný. Slökkviliðsmenn voru á vakt til klukkan fimm í morgun og Þráinn, ásamt öðrum, stóð öryggisvakt til rúmlega sjö í morgun.

„Ég er búinn að standa síðan klukkan tíu í gærkvöldi. Ég var í aðgerðum í meira og minna allan gærdag. Ég tók við aftur klukkan tíu í gærkvöldi og er búinn að standa síðan.“