ruv.is:

 

          Nokkur nýliðun mælist nú í makrílstofninum. Mynd: Rúnar Snær Reynisson

 

Rannsóknarskip Hafrannsóknastofnunar, Árni Friðriksson, er nú í makrílleiðangri á Íslandsmiðum og fer líka inn í grænlensku lögsöguna.

Sveinn Sveinbjörnsson, leiðangursstjóri segir fyrstu rannsóknir benda til nýliðunar. „Það virðist vera að yngri makríll sé að koma inn í veiðistofninn á þessu svæði. Þannig er makríllinn smærri og ekki er eins mikið af stærsta makrílnum. Fyrstu vísbendingar benda því til þess að nokkur nýliðun sé í stofninum, að ungur fiskur sé að koma inn í auknum mæli,“ segir hann.

Árni Friðriksson er um 160 mílur suðvestur af Reykjanesi. Sveinn segir að eftir sé að rannsaka þýðingarmikil makrílmið við landið en minna virðist vera af makrílnum út af Norð-Austurlandi en áður.  Skipið verður einnig í nokkra daga við rannsóknir í grænlensku lögsögunni nú eftir mánaðamótin með vísindamann frá grænlenskum yfirvöldum um borð.

Sveinn segir að vissulega aukist samkeppni um æti í sjónum þegar makrílinn gengur á miðin hér við land í auknum mæli. „Gróflega hefur verið útreiknað að makríllinn taki hátt í 3 milljónir tonna af átu á meðan hann dvelur í þessu magni íslenskri lögsögu,“ segir hann.