Já, svo sannarlega var það óvænt, en um leið skemmtileg uppákoma í Keflavíkurhöfn rétt fyrir hádegi þegar hinir 50 ára gömlu bátar, Húni II EA 740 og Knörrinn, sem báðir voru smíðaðir á Akureyri eftir teikningu Tryggva Gunnarssonar sigldu að bryggju í Keflavíkurhöfn. Erindið var aðallega það að bíða eftir hljóðfæraleikurum sem áttu að spila um borð í Húna II, á ytri-höfninni í Reykjavík, en þar átti næsta stoppistöð bátanna að vera. Notuðu Húnamenn þennan tíma til að þrífa bátinn, þó varla væri hægt að sjá mikla þörf á því.

Fyrir mig var þetta sérlega skemmtileg uppákoma, þar sem ég hef oft verið í sambandi bæði með tölvusamskiptum svo og símleiðis við Þorstein Pétursson, á Akureyri, eða Steina Pjé eins og hann er kallaður, en aldrei höfum við þó séð hvorn annan. Enda eftir að við höfðum heilsast bauð hann mér strax um borð, ásamt nokkrum öðrum, auk þess sem hann bauð mér að koma með þeim á bátnum til Reykjavíkur, en því miður var ég tímabundinn og gat því ekki orðið við þessu boði um ferðina. Steini er leiðangurstjóri  Húna II og varaformaður Hollustufélagsins um Húna II.

Það er af Húna II líka að segja að áður en hann varð gerður út frá Akureyri, var hann í eigu Þorvaldar Skúlasonar í Hafnarfirði og urðum við starfsfélagar um tíma á Hrafnistu í Hafnarfirði.

Því miður uppgötvaði ég það ekki nógu fljótt, að sá sem var við stýrið á Knerrinum og hafði komið um borð á Hornafirði, var fyrrum Njarðvíkingur Guðmundur Gestsson, sem er mjög sigldur  og þá mikið á skútum. Flestir kalla hann þó Genda.

Eins og margir vita eru bátarnir á hringferð um landið í tilefni afmæli þeirra og svona í leiðinni til að sýna bátann.  Dró heimsóknin að sér ýmsa gamla sjóara, sem höfðu gaman að því að bátarnir skildu sigla inn í Keflavíkurhöfn. Annars hefur Húni II áður farið í ferð, að mig minnir til Færeyja m.a. og  nú stefna þeir á þeim báti að fara til eins Norðurlandanna, á mót slíkra báta.

Hér kemur mikil myndasyrpa sem tekin var að bátunum og úr Húna II og einnig er Knörrinn sigldi fyrr úr Keflavík, en Húni II og þá undir stjórn Genda.  Undir myndunum kemur frásögn af því sem kemur fram á þeim.

                        108. Húni II EA 740 og 306. Knörrinn, í Keflavíkurhöfn

                                    108. Húni II EA 740, er glæsilegt skip

                          Hér sjáum við einn skipverja Húna II smúla bátapallinn

                   Grímur Karlsson fyrrum skipstjóri og nú bátasmiður (líkana) og Þorsteinn Pétursson, Steini Pjé leiðangurstjóri og varaformaður Hollavinafélagsins um Húna II, í einhverju skemmtilegu spjalli.

              Grímur Karlsson kominn í hlutverk hafnarvarða og opnar fyrir meira vatn

                                           Steini Pjé að skrúbba Húna II

           306. Knörrinn færir sig hinum meginn við bryggjuna, áður en hann fer á undan til Reykjavíkur. Við stýrið er Gendi

               Neðan þilja hefur lestin m.a. verið innréttuð í skemmtilegt rými og þar má sjá myndir og margt annað er tengjast Húna II. Hér er það annars vegar auglýsing fyrir mótið í Noregi í sumar og hinsvegar teikning af miðbandi í Húna II. Benti Steini Pjé, Grími Karlssyni að þeir ættu mikið af teikningum um myndum af bátnum og því ætti hann að geta gert líkan af bátnum.

            F.v. Steini Pjé, Oddur Sæmundsson skipstjóri og útgerðarmaður og Einar Magnússon, útgerðarmaður, kræklingabóndi og stjórnarformaður Reykjaneshafna, virða fyrir sig myndir og hlusta á fróðleik um bátinn.

               Hið snyrtilega vélarúm og þá ekki síður vel máluð aðalvélin vakti athygli Odds Sæmundssonar

                 Margir gamlir sjóarar, litu við þegar bátarnir komu til Keflavíkur. Hér er Jónas Franzson fyrrum skipstjóri (t.h.) á spjalli við skipverja af Húna II

           Mér eru þekkt andlit úr sjómennskunni f.v. Davíð Eyrbekk, Ísleifur Guðleifsson, Hallbjörn Sæmundsson og Eiríkur Erlendsson að fylgjast með hljóðfæraleikurunum sem fóru með Húna II til Reykjavíkur. Þessa tvo hljóðfæraleikarar sem sjást þarna lengst til vinstri þekki ég ekki, en þeirra hlutverk og félaga þeirra sem sjást ekki á myndinni,  var að spila um borð í Húna II, á Ytri-höfninni í Reykjavík um leið og skipin fluttu flautukonsertinn í tilefni af opnum Listahátíðar í Reykjavík

                        © myndir Emil Páll, í dag 17. maí 2013

AF Facebook:

Guðni Ölversson Frábært framtak sigling þessara einstöku og fallegu báta kringum landið.