Frá þessu sagði Bjarni Guðmundsson, Neskaupstað frá þessu hér á síðunni í gærmorgun

ruv.is:

          Erlendir sjómenn eru ósáttir við kjör sín á flutningaskipinu Cool Aster en það liggur við bryggju í Neskaupstað og bíður þess að fara með frosnar afurðir á markað í Austur-Evrópu.

Erlendir sjómenn á flutningaskipinu Cool Aster lögðu niður vinnu í Neskaupstað í gær en þeir höfðu ekki fengið laun í tvo mánuði. Síldarvinnslan hljóp undir bagga og greiddi laun en samt vill meirihluti áhafnar komast frá borði.

Flutningaskipið Cool Aster er 109 metra langt og gert út frá Múrmansk í Rússlandi. Í áhöfn eru 16 menn, Rússar, Úkraínumenn og Lithái en skipið siglir undir fána sambandsríkis sem kennt er við eyjarnar Sankti Kristófer og Nevis í Karíbahafi. Það sigldi áður undir fána Möltu en eftir árás sjóræninga á skipið við strendur Nígeríu í fyrrasumar komst það í hendur nýrra eigenda sem hafa ekki greitt áhöfninni laun í tvo mánuði. 

Skipið sigldi tómt frá Casablanca í Marokkó og kom til Neskaupstaðar á laugardag til að sækja frosnar afurðir. Áhöfnin lagði þá niður vinnu að frumkvæði Alþjóðaflutningaverkamannasambandins, ITF. Síldarvinnslan skarst í leikinn og gekkst í ábyrgð fyrir launum en á endanum verður það kaupandi afurðanna sem borgar. Jónas Garðarsson er framkvæmdastjóri Sjómannafélags Íslands og eftirlitsfulltrúi ITF hér á landi. Hann segir að nú hafi nýr kjarasamningur verið gerður við útgerð skipsins sem hækki læstu laun um 50 prósent; úr um 150 þúsund krónum upp í 230 þúsund. Samt vilji meirihluti áhafnar fara frá borði en reynt sé sannfæra mennina um að fara með skipinu á áfangastað sem er Odessa í Úkraínu. Þangað er þriggja vikna sigling með 4000 tonn af frosinni loðnu. Óvíst er hvernig fer en gangi mennirnir frá borði þyrfti að senda nýja áhöfn til landsins. Jónas segir líklegast að mennirnir sigli með skipinu til Odessa en séð verði til þess að eftirlitsfulltrúi ITF taki á móti þeim til að tryggja rétt mannanna.

Fulltrúi ITF hér á landi fer í óvæntar heimsóknir í 70-80 skip á ári. Jónas segir að stundum þori áhöfn ekki að tala við eftirlitsfulltrúa en þá sé hægt að skoðað bókhald skipanna til að sjá kjör áhafnar. Í fyrra leiddu þessar heimsóknir til þess að nýir kjarasamningar voru gerðir við útgerðir fimm skipa og það sem af er þessu ári hafa tveir slíkir samningar verið gerðir.