Nokkrir skipverjar skutust í land á slöngubáti. Mynd: Sighvatur Jónsson

Loðnuskip strandaði í Vestmannaeyjahöfn í dag aðeins nokkur hundruð metra frá bryggju. Skipið losnaði eftir tvær klukkustundir og áhöfnin stefnir hraðbyri á veiðar á ný en kvótinn var aukinn um ríflega 100.000 tonn í dag.

Skutust í land á slöngubáti
Drekkhlaðin Kap VE-4 sat föst í Vestmannaeyjahöfn um hádegisbil í dag. Skipverjar komust hvorki lönd né strönd og brugðu á það ráð að skjótast í land á slöngubáti. Ragnar Þór Jóhannsson háseti segir að um þúsund tonn af loðnu hafi verið í skipinu og vegna fjöru hafi það setið fast á sandhól sem hafi myndast í innsiglingunni eftir Herjólf.

Skipstjórar kvartað yfir sandhrygg
Um tveimur tímum síðar hafði flætt nógu mikið að svo skipið gæti lagst að bryggju og löndun hafist. Skipstjórar í Eyjum hafa kvartað yfir hryggnum sem myndast þegar skrúfur Herjólfs þyrla upp sandi. Kap ristir rúma sjö metra og skipstjórinn telur að það hafi munað einungis tuttugu sentímetrum þegar skipið strandaði.

Loðnukvótinn aukinn í dag
Áhöfnin var ánægð með túrinn sem var sá fyrsti á grunnnótarveiðum þessa vertíðina. Ríflega þúsund tonna aflinn fékkst í sex köstum austan við Hornafjörð. Eftir mælingar við austan og norðanvert landið að undanförnu var loðnukvótinn í dag aukinn um 120.000 tonn. Að öllu töldu er leyfilegur hámarksafli þessa vertíðina 570.000 tonn.