Landhelgisgæslan er alltaf á vaktinni. mbl.is/Styrmir Kári

Nokkur erill hefur verið á stjórnstöð Landhelgisgæslunnar í nótt og í morgun vegna aðstoðarbeiðna, bæði til sjós og lands. Upp úr klukkan níu hafði bátur, sem staddur var norður af Gjögurtá nyrst í Eyjafirði, samband og sögðu skipverjar að bilun væri í stýrisbúnaði. 

Fram kemur í tilkynningu frá Gæslunni, að haft hafi verið samband við björgunarbát Slysavarnafélagsins Landsbjargar, BB Jón Kjartansson frá Húsavík, sem hafði nýverið látið stjórnstöð vita að þeir hefðu lagt úr höfn á Húsavík. Um klukkan 12:45 kom Jón Kjartansson að bátnum og fylgdu honum til Akureyrar, þangað sem þeir komu heilu og höldnu um kl. 13:35.

Um klukkan 12:30 hafði bátur á leið fyrir Garðskaga samband vegna slæms veðurs og sjólags á svæðinu.  Ákveðið var að fylgjast sérstaklega með ferð hans fyrir Garðskaga og til Sandgerðis þangað sem hann kom kl. 14:09.

Líkt og greint hefur verið frá þá hafði fjarskiptamiðstöð lögreglunnar samband við stjórnstöð rétt fyrir klukkan tvö í nótt og óskaði eftir aðstoð þyrlu vegna fólks í tveimur jeppum sem taldir voru í námunda við Skjaldbreið. Björgunarsveitir höfðu verið kallaðar út en höfðu ekki fundið jeppana. TF-LIF fór í loftið um klukkan þrjú en tuttugu mínútum seinna var aðstoð hennar afturkölluð þar sem björgunarsveitir höfðu fundið jeppana og komu þeim til hjálpar.

Um klukkan hálf fimm í morgun hafði bátur samband sem staddur var um 5 sjómílur norður af Skagatá, en skipstjórinn taldi að eitthvað væri í skrúfunni. Stjórnstöð Landhelgisgæslunnar kallaði þegar út björgunarskip Slysavarnafélagsins Landsbjargar, Sigurvin frá Siglufirði, sem fór bátnum til aðstoðar. Sigurvin kom að bátnum um klukkan sjö og hóf að draga hann áleiðis til Siglufjarðar.  Bátarnir komu til Siglufjarðar um klukkan 11.