Vefur Landhelgisgæslunnar:

Fimmtudagur 17. janúar 2013

Sprengjusveit Landhelgisgæslunnar gerði eftir hádegi í dag tilraun til að komast út í Eldey til að skoða torkennilegan hlut, sem gæti verið sprengja úr síðari heimsstyrjöldinni. Ætlunarverk þeirra tókst ekki þar sem kominn var fugl í eyjuna og veður ekki upp á hið besta. Munu þeir fylgjast með eyjunni á næstunni og gerð verður önnur tilraun þegar tækifæri gefst. Fyrsta verk sprengjusérfræðinga er að staðfesta hvort þarna sé sprengja og hvað hún sé stór. Er þá hægt að segja til um ráðstafanir sem verður gripið til og verður í ferlinu unnið náið með Umhverfisstofnun. Hægt er að fylgjast með lífi í eyjunni í gegnum vefmyndavél á slóðinni www.eldey.is (Opnast í nýjum vafraglugga) milli kl. 12:00 og 16:00.

Þessi torkennilegi hlutur fannst þegar vísindamenn og starfsmenn Umhverfisstofnunar fór um síðastliðna helgi út í Eldey að gera við vefmyndavél sem þar er. Þyrla Landhelgisgæslunnar flaug með vísindamennina og sótti þá síðar um daginn. Erfitt er að lenda í eyjunni en hægt að tilla þyrlunni og síga niður.

Hér eru myndir frá leiðangri í Eldey árið 2008 þar sem flogið var með þyrlunni TF EIR  sem var af gerðinni Dauphin og er mun minni en þyrlurnar sem nú eru í notkun hjá LHG.