mbl.is:

Fiskibáturinn Jónína Brynja var nýlega afhentur útgerðinni í Bolungarvík. mynd/Bæjarins besta

Bátur fer í dag á vegum tryggingafélags og útgerðar fiskibátsins Jónínu Brynju á strandstað norðan við Straumnesvita. Tilgangurinn er að kanna aðstæður og hvort möguleiki sé á að draga bátinn út eða bjarga einhverjum tækjum úr honum, samkvæmt upplýsingum frá útgerðinni.

Annar bátur verður sendur á staðinn, ef líkur eru taldar á að hægt verði að draga bátinn af strandstað.

Báturinn er glænýr og er verðmæti hans og tækja talið vera um 130 milljónir kr. Tveir menn sem voru á bátnum komust upp í fjöru og voru hífðir upp í björgunarþyrlu Landhelgisgæslunnar.

Lögreglan á Vestfjörðum fer með rannsókn á tildrögum slyssins.