Útgerðarfyrirtækið Kæja ehf, sem gerir út stálskipið Portland VE, er til sölu með um 250 þorskígildistonnum.  Benóný Benónýsson, aðaleigandi útgerðarinnar segir ástæðuna fyrir hugsanlegri sölu einfalda, litlu útgerðarfyrirtækin eins og fyrirtæki hans, ráði einfaldlega ekki við aukið veiðigjald sem ríkisstjórn Jóhönnu Sigurðardóttir lagði á sjávarútveginn á nýhöfnu kvótaári.

"Þetta er ekkert leyndarmál, við erum að skoða hvað við getum gert og höfum sett fyrirtækið í heild sinni á sölu.  Við erum einfaldlega með allt of lítinn kvóta til að geta staðið undir auknum álögum hins opinbera og þar vegur veiðigjaldið lang þyngst.  Rekstur útgerðarinnar var í þokkalegu standi á síðasta fiskveiðiári, við höfðum okkar laun út úr þessu en ekki mikið meira en það," sagði Benóný sem hefur rekið útgerðina ásamt tveimur sonum sínum.

 

"Ég er ansi hræddur um að fleiri útgerðir í þessum stærðarflokki eigi hreinlega eftir að þurrkast út og þeir stóru fái meira í sinn hlut.  Ég hélt að það væri ekki samkvæmt stefnu ríkisstjórnarinnar en að þessu hefur hún stuðlað með nýju veiðigjaldi.  Þetta bitnar verst á smærri útgerðum."

"Nei, þetta er allt á frumstigi ennþá.  Við erum með aðila í að sjá um þetta fyrir okkur en það var samhljóma álit okkar í fjölskyldunni að fara þessa leið.  Ég er með peyjana með mér í þessu og þeir hafa tekið við þessu að miklu leyti en þeir voru sammála um að þetta væri eina leiðin miðað við núverandi ástand.  Eitthvað þurftum við að gera, annað hvort að selja eða bæta við okkur kvóta og það kaupir enginn kvóta í dag nema þessir stóru.  Helst hefði maður viljað hafa þessar einstaklingsútgerðir áfram því það skapast mikil vinna í kringum þær, bæði við útgerðina og þjónustu í kringum þær.  En ég er hræddur um að þessum smærri útgerðum eigi eftir að fækka ef ekkert verður gert."

"Ekki ennþá en sá aðili sem sér um söluna hefur fengið þau skilaboð að leita eftir því að selja hér innanbæjar, sé þess kostur."

 

Eyjafréttir heyrðu hljóðið í fleiri útgerðarmönnum og flestir segja að nýtt veiðigjald sé of stór biti fyrir smærri útgerðir.  Einhverjir sögðu að það gæti farið svo að þeir myndu selja útgerðina miðað við núverandi ástand enda rekstrargrundvellinum kippt undan þeim með veiðigjaldinu.