"Þetta er stærsti dagur í sögu fyrirtækisins hvað farþegafjölda varðar," sagði Þórunn Harðardóttir hjá hvalaskoðunarfyrirtækinu Norðursiglingu í kvöld en rúmlega eitt þúsund farþegar fóru í hvalaskoðun með bátum fyrirtækisins í dag.

 Þar af voru 66 farþegar sem fóru með báti fyrirtækisins sem siglir með farþega í hvalaskoðun frá Ólafsfirði.

 Til að anna öllum þessum fjölda farþega fékk Norðursigling eikarbátinn Húna II frá Akureyri til  liðs við sig. Að sögn Þórunnar gekk þetta allt snurðulaust fyrir sig og farþegar sáu hvali í öllum ferðum dagsins.

 Þórunn segir vaxandi straum ferðamanna til Húsavíkur þessa dagana skýra þennan mikla fjölda en einnig séu farþegar í ferðum dagsins sem ekki komust  í hvalaskoðun í gær þar sem bræla var á Skjálfanda fram eftir degi.

 Hjá Gentle Giants hefur dagurinn einnig verið góður, stökkvandi hnúfubakar og höfrungar hafa glatt augu farþega  fyrirtækisins.

"Sannkölluð hvalaveisla," Sagði Daniel Annisius en farþegar dagsins voru vel á fjórða hundrað.