bb.is


                           Discovery og 2642. Sturla Halldórsson © mynd bb.is

Annríki verður í móttöku skemmtiferðaskipa á Ísafirði næstu daga því von er á sjö skipum á rúmri viku. "Hérna eru allir á tánum og tilbúnir að takast á við síðustu stóru áskorun sumarsins," segir K. Svava Einarsdóttir hjá skemmtiferðaskipadeild Vesturferða. Á morgun heimsækir LE Boreal nú Ísafjörð en það er svo væntanlegt aftur í þriðja og síðasta skiptið þetta sumarið á miðvikudag í næstu viku. Skipið er franskt, 10.700 tonn að stærð, en með því koma um 300 farþegar.

Á fimmtudag kemur skipið, Discovery, sem flytur um 700 manns, en það er góðkunnur gestur því það hefur komið við á Ísafirði síðustu sumur. Á föstudag kemur Saga Ruby til Ísafjarðar en það er tæp 25 þúsund brúttótonn að stærð og með því koma um 650 farþegar.

MSC Lirica er svo væntanlegt á laugardag en það er tæplega 60.000 brúttótonna skip og ber um 2000 farþega. MS. Delphin kemur á sunnudag með um 300 farþega. Á fimmtudag eftir viku er svo von á Thompson Spirit. Um borð eru 1.350 farþegar, flestir breskir en það er tæplega 34 þúsund brúttótonn.

Má því búast við að mannlífið muni bera þess merki að ferðamenn spóki sig um götur Ísafjarðar, fara í rútuferðir eða með bátum inn í Vigur en að sögn K. Svövu er vel bókað í skipulagðar ferðir á vegum ferðaþjónustunnar. "Le Boreal er mjög skipulagt og þægilegt skip, svo kemur Discovery og það verður um nóg að snúast í kringum þá en það er fullbókað í allar Vigur- og Hesteyrarferðir. Ég er reyndar ekki komin með tölur enn fyrir föstudag en það verður heljarinnar fjör á laugardag og svo hægist aftur um á sunnudag."