Flutningaskipið MSC Flaminia rekur nú um Atlantshaf, um þúsund sjómílur frá landi, eftir að sprenging varð í lestarrými þess á laugardag. Enn stígur mikill og svartur reykur frá skipinu en ekki er búist við að dráttarbátur með búnaði til að berjast við eldinn komi að fyrr en á morgun. Einn úr áhöfninni er látinn, annar á gjörgæsludeild og eins er saknað.

Neyðarkall barst frá skipinu á laugardagsmorgun þegar það var svo gott sem mitt á milli Kanada og Bretlandseyja. Skipið sem siglir undir þýskum fána var á leið frá austurströnd Bandaríkjanna til Antwerpen í Belgíu. Ekki er vitað hvers vegna sprenging varð í lestarrýminu en í kjölfar hennar kviknaði mikill eldur.

Áhöfn 25 manna yfirgaf skipið í skyndi, fyrir utan einn sem er saknað og talinn af, og var þeim bjargað um borð í olíuflutningaskipið VLCC DS Crown. Ekki reyndist unnt að notast við björgunarþyrlur vegna þess hversu langt skipið var frá landi.

Fjórir slösuðust og voru þeir síðar fluttir yfir í flutningaskipið MSC Stella þar sem einn lést af brunasárum sínum. Hinir þrír voru fluttir frá Stellu með þyrlu til Asor-eyja, einn af þeim liggur í lífshættu á gjörgæsludeild.

MSC Flaminia er 85,823 tonna skip sem tekur 6,750 tuttugu feta gáma. Það er nærri þrjú hundruð metra langt og fjörutíu metra breitt.