dv.is:

Eiríkur Guðberg Guðmundsson, háseti á Skálafelli ÁR 50, bjargaði félaga sínum úr sjónum um hálf ellefu leytið í morgun eftir að hann fór útbyrðis með neti. Skipið var á veiðum á Selvogsbanka þegar slysið átti sér stað en annar skipverji flæktist einnig í netinu en Eiríkur náði að ýta honum frá þannig að hann færi ekki einnig útbyrðis.

Eiríkur segist hafa ákveðið að bíða með að stökkva á eftir félaga sínum sem fór útbyrðis því hann náði að halda sér í stertinn og beið Eiríkur eftir því að hann kæmi sér nær skipinu.

"Á meðan því stóð kom ég mér í gallann og stökk út á eftir honum og kom honum í Markúsarnet og aftur upp í skip," segir Eiríkur sem gerir lítið úr sínum hlut. "Hann hefði gert það sama fyrir mig. Þetta er bara að stökkva í sjóinn," segir Eiríkur Guðberg.

Sigurður Viggó Gunnarsson, skipstjóri á Skálafelli, segir manninn sem fór útbyrðis hafa bjargast giftusamlega. "Það hjálpuðust allir að. Það var snarræði að einn var afburðafljótur að fara í flotgalla til að koma honum aftur um borð," segir Sigurður Viggó sem segir hásetan sem fór útbyrðis vera við ágætis heilsu í dag. "Það er mesta furða hvað þetta slapp vel," segir Sigurður Viggó.

"Þetta gerðist mjög fljótt. Það er sett strax í gang áætlun sem menn hafa æft í slysavarnaskólanum. Á augnabliki fer strax í gang áætlun til að koma honum aftur um borð. Hún gekk mjög vel, það tók ekki nema tvær þrjár mínútur að koma honum aftur um borð," segir Sigurður Viggó.