bb.is:

Vel fór um grásleppuna baðaða í ís í lágum körum. Mynd smabatar.is.

Grásleppuveiðar hófust á fimm veiðisvæðum í gær, við Vestfirði, á Faxaflóa, í utanverðum Breiðafirði, Norðurlandi frá Skagatá og austur úr og suður að Hvítingum. 1. mars var heimilt að hefja veiðar við Reykjanes sunnan Garðskaga. Frá því er greint á vef Landssambands smábátaeigenda að 72 bátar hafi haft leyfi til að leggja netin í dag og virðist sem flestir hafi nýtt sér þann rétt.

Haft er eftir Hafsteini Sæmundssyni á Trylli GK frá Grindavík að grásleppan sem fékkst hafi verið mjög stór og með góða hrognafyllingu. Hafsteinn sagðist aðspurður að nokkur áhætta væri að byrja svo snemma vegna þorsksins, en það væri heldur ekki gott að bíða þar sem reynsla undanfarinna ára sýndi að besta veiðin væri fyrstu daganna.