Hafrannsóknarskipið Bjarni Sæmundsson. mbl.is

Magn kynþroska loðnu var miklu minna en búast hefði mátt við eftir ungloðnumælingar haustið 2010. Þetta er niðurstaða loðnurannsókna sem Hafrannsóknarstofnun stóð fyrir í desember. Stofnunin getur ekki gefið út upphafsaflamarki á grundvelli þessara mælinga.

Á undanförnum árum hefur ungloðna verið mæld í október - nóvember en vegna verkfalls á rannsóknaskipunum hófst leiðangurinn nú seinna en áætlað var eða 29. nóvember á Árna Friðrikssyni og 30. nóvember á Bjarna Sæmundssyni. Bæði skipin luku leiðangrinum 10. desember.

Árni Friðriksson kannaði svæðið frá Kolbeinseyjarhrygg vestur í Grænlandssund en Bjarni Sæmundsson sem var jafnframt í sjórannsóknum kannaði svæðið austan Kolbeinseyjarhryggs. Engin loðna fannst austan Kolbeinseyjarhryggs en loðna fannst með kantinum vestan Kolbeinseyjar frá um 20°30' v.l. allt að sunnanverðu Grænlandssundi. Á austanverðu svæðinu var loðnan mikið blönduð, ókynþroska ungloðna og fullorðin loðna, á miðbiki útbreiðslunnar var meiri hlutinn fullorðin loðna og vestast á svæðinu var mest ókynþroska ungloðna. Ekki var unnt að kanna grænlenska landgrunnið og svæði við Austur-Grænland vegna rekíss og ísmyndunar.

Lítið mældist af loðnu í leiðangrinum og var fjöldi ungloðnu svipaður og í lélegu árunum frá 2004-2009 og aðeins um 10% af því sem mældist haustið 2010. Í fréttatilkynningu frá Hafrannsóknarstofnun segir að ekki verði á þessum grunni unnt að mæla með upphafsaflamarki haustið 2012.

Í fyrra haust voru ungloðnumælingarnar gerðar á tímabilinu 24. september til 11. október eða um tveimur mánuðum fyrr. Þá var hluti ungloðnunnar á því svæði sem unnt var að kanna nú en langmest af loðnunni, bæði ungloðnu og eldri loðnu, var á grænlenska landgrunninu og norður með Austur-Grænlandi allt norður fyrir Scoresbysund (71° n.br.), eða á svæði sem ekki var unnt að kanna núna vegna íss. Ekki verður fullyrt um hvort dreifing loðnunnar er með sama hætti og í fyrra en ef það er raunin var stærstur hluti loðnustofnsins utan rannsóknasvæðisins í ár. Reiknað er með að gerð verði tilraun til frekari ungloðnumælinga á nýju ári ef aðstæður leyfa.