Hoffell SU 80 kemur til Fáskrúðsfjarðar á 4 tímanumí nótt með Ölmu í togi. mbl.is/Albert Kemp

Flutningaskipið Alma lagðist að höfn í Fáskrúðsfirði klukkan 3:26 í nótt. Alma var dregin af togaranum Hoffelli og gekk aðgerðin eins og best verður á kosið, að sögn Landhelgisgæslunnar.

Alma missti stýrið við innsiglinguna í Hornafjarðarhöfn í fyrrinótt. Hoffellið dró skipið út á sjó, en dráttartaugin slitnaði um tveimur klukkustundum síðar.

Um klukkan hálf fjögur í gær tókst svo að koma nýrri taug milli skipanna.

Mikill viðbúnaður var hjá Landhelgisgæslunni, tvö varðskip voru send austur og var öðru þeirra snúið við þegar skipin voru komin í mynni Fáskrúðsfjarðar. Annað skipanna, nýi Þór,  er enn á staðnum og bíður fyrirmæla. Þyrla Gæslunnar var einnig kölluð á vettvang og flutti stýrimann um borð í Ölmu á sjötta tímanum í gær.

Þyrlan er enn fyrir austan, en áhöfn hennar er í hvíld.

Upphaflega stóð til að Alma yrði dregin að höfn í Reyðarfirði, en siglingin til Fáskrúðsfjarðar var styttri og þótti öruggari vegna veðurs