bb.is:

Skipið keyrði stefnið upp í bryggjuna til að komast að landi. Dekk sem verja skip og bryggju rifnuðu. Smávegis sá á stefni skipsins eftir átökin.

Sjónarvottar sem staddir voru við Sundahöfnina á Ísafirði í morgun er fyrsta skemmtiferðaskip sumarsins, MV Athena, lagðist að bryggju, leist ekkert á blikuna er sterk vindhviða skall á skipinu. Keyra þurfti stefni skipsins upp að bryggjunni til að stoppa rek þess og við það slitnaði landfesti og gúmmídekk á bryggjukantinum rifnuðu. Guðmundur M. Kristjánsson, hafnarstjóri, segir enga hættu hafa verið á ferðum. "Það var svolítill vindur og þetta er gamalt skip og ekki eins gott í snúningum eins og nýrri skip en þetta gekk allt samkvæmt áætlun. Þetta lítur allt öðruvísi út en þegar það er logn og blíða en þetta gekk allt vel."

Guðmundur segir að það stefni í spennandi sumar hjá hafnarstarfsmönnum en eins og fram hefur komið er metþátttaka í skemmtiferðaskipakomum til Ísafjarðar í ár.