Háskólasetur Suðurnesja í Sandgerði hefur rannsakað grjótkrabbann undanfarin ár en krabbinn er nýlegur landnemi við Ísland.  Utan NA-Ameríku er Ísland eina landið sem krabbinn hefur náð fótfestu og hann því afar áhugaverður til rannsókna, auk þess sem hann er óneitanlega mjög bragðgóður.

Nú á dögunum hafði Þráinn Freyr Vigfússon matreiðslumeistari samband við setrið og spurðist fyrir um grjótkrabba en hann vantaði nokkur eintök til að æfa sig á fyrir matreiðslukeppnina Bocuse d´Or sem mun fara fram 25. - 26. janúar í Lyon í Frakklandi.

Þráinn mun keppa fyrir Íslands hönd en keppnin er ein allra virtasta matreiðslukeppni sem haldin er í heiminum og oft kölluð hin eina sanna heimsmeistarakeppni í matreiðslu.  Háskólasetrið brást að sjálfsögðu vel við og útvegaði nokkra stóra og stæðilega grjótkrabba úr búrunum í Sandgerði, sem Þráinn og félagar matreiddu svo eftir kúnstarinnar reglum.

Í keppninni sjálfri eiga þeir að útbúa rétti úr töskukrabba en þar sem hann fæst ekki hér við land var grjótkrabbinn notaður í staðinn. Þráinn var hæstánægður með útkomuna enda grjótkrabbinn bragðgóður og án efa úrvalshráefni fyrir meistarakokka.

Við óskum Þráni og félögum góðrar ferðar til Frakklands og góðs gengis í keppninni. Áfram Ísland!