Ástand lúðustofnsins hér við land er mjög bágborið og rannsóknir á stofninum ófullnægjandi. Þetta kemur fram í greinargerð sem Jón Bjarnason sjávarútvegs- og landbúnaðarráðherra hefur látið taka saman.

Ráðherrann skipaði starfshóp sem sæti áttu í starfsmenn ráðuneytisins, Fiskistofu og Hafró. Á meðal þess sem fram kemur í greinargerðinni er að engin aflamarksstýring er á lúðuveiðum en meirihluti lúðuafla berst sem meðafli. "Auk þess eru stundaðar beinar línuveiðar á lúðu með svokallaðri haukalóð og hefur sú veiði farið vaxandi á undanförnum árum," segir ennfremur.

Hafrannsóknarstofnunin hefur um árabil lagt áherslu á að stöðva beinar lúðuveiðar og í greinargerðinni er tekið undir þá tillögu um leið og öðrum möguleikum til að takmarka sókn í stofninn er velt upp.

Engar ákvarðanir liggja fyrir og er málið nú í höndum ráðherra.