Frumvarp um viðbótarkvóta situr fast í ríkisstjórninni. Frumvarpið er sett fram af Jóni Bjarnasyni sjávarútvegsráðherra en mánuður er liðinn síðan ráðherra lagði frumvarpið fram. Í kvöldfréttum Ríkisútvarpsins var fullyrt að litlar líkur séu á að það verði afgreitt. Þessu ber saman við heimildir DV sem lýsa því að málið sé hið vandræðalegasta fyrir ríkisstjórnina sem sé klofin.

Frumvarpið gerir ráð fyrir að sjávarútvegsráðherra fái heimild til að ráðstafa viðbótarkvóta í nokkrum tegundum til annarra en núverandi kvótahafa og leigja á markaði. Bæði ráðherrar innan Vinstri grænna og Samfylkingarinnar eru sagðir klofnir í afstöðu til málsins. Verði frumvarpið að lögum þá getur ráðherra úthlutað tíu þúsund lestum af þorski, 5 þúsund lestum af ýsu, 5 þúsund af gullkarfa og 4 þúsund af ufsa til annarra en kvótahafa.