Maria Damanaki, fiskveiðistjóri Evrópusambandsins, undirbýr nú löndunarbann á íslenskan fisk innan Evrópusambandsins og ætlar að beita fyrir sig ákvæði í samningum um Evrópska efnahagssvæðið til þess samkvæmt heimildum DV í Brussel.

Hugsanlega verður gefin út yfirlýsing um málið í dag. Málið tengist makrílstríðinu en Jón Bjarnason sjávarútvegsráðherra gaf út 147 þúsund tonna makrílkvóta fyrir skemmstu í trássi við vilja Evrópusambandsins, Norðmanna og annarra.

Ákvæðið sem Damanaki hyggst beita hljóðar sem svo að ESB (eða Ísland) geti neitað að landa fisk sem sameiginlegir hagsmunir eru um ef upp kemur "alvarlegur ágreiningur um nýtingu hans."

Heimildir DV herma að Damanaki sé nú að leggja drög að því að beita þessu ákvæði í deilunni við Íslendinga og senda þar með skýr skilaboð til Íslendinga. Eftir er að sjá hvort ákvæðið verður aðeins látið gilda um löndun á makríl sem veiddur er af Íslendingum.

Samkvæmt heimildum DV hefur Damanaki sent forseta sameiginlegu EES-nefndarinnar formlega beiðni um fund vegna málsins. Hann skuli fram fram við allra fyrsta tækifæri og eigi síðar en 14. janúar næstkomandi til að ræða áform ESB um löndunarbann á íslenskan fisk.