Af vefnum bb.is:

Spáð er óvenju hárri sjávarstöðu dagana 8. til 11. september. Landhelgisgæslan vekur athygli á þessu á vef sínum. Á Ísafirði er spáð 2,5 m sjávarhæð á kvöldflóði á morgun og á fimmtudag. Sjávarhæð á síðdegisflóðinu í Reykjavík sömu daga verður allt að 4,5 m, samkvæmt sjávarfallatöflum sem sjómælingasvið Landhelgisgæslunnar reiknar og gefur út. Sjávarhæð á meðalstórstraumsflóði í Reykjavík er 4,0 m. og á Siglufirði er spáð 1,5 m sjávarhæð þessa sömu daga. Á Djúpavogi er spáð að hæðin verði 2,5 m 9. og 10. september.

Meðalstórstraumsflóð á Ísafirði og Djúpavogi er 2,2 m en á Siglufirði er það 1,3 m. Í Reykjavík og á Ísafirði getur sjávarhæð á fjöru farið 10 til 20 sentimetra niður fyrir núll-við miðun sjómælinga þessa daga. Útreikningur sjávarfallataflna miðast við meðalloftþrýsting sem er 1013 millibör. Lægri loftþrýstingur veldur hærri sjávarstöðu, u.þ.b. 10 sm fyrir hver 10 millibör.

"Umsjónarmenn báta og skipa eru beðnir um að fylgjast vel með veðri þessa daga," segir í tilkynningu