Þá er dagskrá Sandgerðisdaga að taka á sig mynd og glæsilegur Sandgerðisdagavefur fer nú í loftið þar sem viðburðir tínast inn og sífellt er von á meiri skemmtun. Vefurinn hefur nú tekið á sig nýja mynd og er skreyttur minningum frá liðnum Sandgerðisdögum.

Sandgerðisdagar hafa verið að lengjast frá ári til árs og nú er svo komið að boðið er upp á skipulagða viðburði frá mánudegi til sunnudags. Formleg setning daganna fer nú fram miðvikudaginn 25. ágúst og hátíðardagskrá sem áður var á föstudegi hefur verið færð að kvöldi miðvikudags.

Gaman er að segja frá því að í undirbúningi er skemmtileg dagskrá fyrir ungt fólk á aldrinum 15 til 20 ára sem fram fer föstudaginn 27. ágúst. Er það von þeirra sem að Sandgerðisdögum standa að þátttaka verði góð þannig að hægt verði að þróa viðburðinn enn frekar í framtíðinni.

En nú fer Sangerðisbær í sparifötin!

Gulur, rauður, grænn og blár verða einkennislitir okkar næstu daga og við undirbúum okkur fyrir skemmtilega hátíð. Samhugur okkar Sandgerðinga, gleðin og vináttan er það sem einkennir dagana þegar við bjóðum vinum heim og við getum verið stolt af því hvernig okkur öllum hefur tekist til að gera Sandgerðisdaga að því sem þeir eru.

Nýr vefur Sandgerðisdaga: www.sandgerdisdagar.is